Марий Эл Правительствыште Зелёный Дол- Яранск кӱртньӧ корным Котельнич марте шуйымо йодышым каҥашеныт

Марий Эл Правительствыште Зелёный Дол- Яранск кӱртньӧ корным Котельнич марте шуйымо йодышым каҥашеныт
             Марий Эл Правительствыште Зелёный Дол- Яранск кӱртньӧ корным Котельнич марте шуйымо йодышым каҥашеныт. Республикым вуйлатыше Юрий Зайцевын виктарымыже почеш Зелёный Дол- Котельнич могырышкыла грузым шупшыктымаш могай кугыт лийшашым рашемдыме шотышто регион- влак кокласе пашаче группын заседанийже лийын. Заседанийыште Татарстанын, Киров областьын, Россий кӱртньӧ корнын еҥже- влак лийыныт. Кӱртньӧ корным Котельнич марте шуйымо йодышым Федераций Советыште Марий Элын кечыжым эртарыме лектыш почеш Россий парламентын кӱшыл палатыжын пунчалышкыже пуртымо. Марий Элым вуйлатыше палемден: корным шуйымаш Российыште кӱртньӧ корно транспортым вияҥдыме кӱлешан йодыш улеш, поснак Марий Эл, Татарстан да Киров областьлан. Марий Эл гоч Зелёный Дол- Яранск тупик корно да ныл меҥге кужытан Зелёный Дол-Волжск тупик корно уло. «Йӱдвел-кечывалвел» кӱртньӧ корно коридорышто кӱрылтышым пытараш да Транссибирь магистральын йӱдвел ден кечывалвел ужашыжым ушаш манын Котельнич марте корным шуяш да электрифицироватлаш кӱлеш,- каласен Юрий Зайцев. Марий Элыште грузым колтышо тӱн отрасльыш топливно-энергетик, химий, пушеҥгым обрабатыватлыше промышленность да военно-промышленный комплекс улыт. Кӱртньӧ корнын ончыктымыжо почеш 2023-шо ийыште Марий Элыште кӱртньӧ корно дене 841 тӱжем тонн грузым колтымо. Тидыже 2022-шо ийысе тыгаяк жапысе показатель деч кум пачашат пелылан шукырак. Кызытеш Яранск гыч Котельнич марте корнын кок вариантше темлалтеш: автомобиль корно ден йыгыре кӱчык корно да Советск ола гоч, кокымшыжо 50 меҥгылан кужурак лиеш. Кокытшат шотлен аклымым йодыт.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски