Марий Эл Узбекистан дене ужалкалыме да экономике кылым кумдаҥдаш шона
Марий Эл Узбекистан дене ужалкалыме да экономике кылым кумдаҥдаш шона. Теҥгече Марий Элыш Узбекистан Республикын делегацийже толын. Тудым Чрезвычайный да Полномочный посолжо Ботиржон Асадов вуйлата. Тиде визит мемнан эл коклаште кылым пеҥгыдемдымым ончыкта да вашкыллан у ончыкылыкым почеш,- каласен Марий Элын промышленность, экономически вияҥмаш да торговля министрже Владимир Халюзин. Уна- влак республикын куатшым ончыктышо кум вӱдышӧ предприятийыште лийыныт, у производство площадке, ончыл технологий, кӱкшӧ автоматизаций дене палыме лийыныт. Тиддеч вара экономически вияҥмаш министерствыште производство совещаний лийын. Тушто ужалкалыме-экономике вашкылым кумдаҥдаш кӱлешан корно- влакым каҥашыме. Владимир Халюзинын мутшо почеш Марий Эл ден Узбекистан коклаште 2024-ше ийысе 9 тылзе жапыште внешний торговльын кугытшо 8 миллионат 500 тӱжем долларым эртен. Тидыже вашкылым кугемдаш кӱлешлыкым ончыкта.
Фото: Владмир Халюзинын ВК-же.
Фото: Владмир Халюзинын ВК-же.
