Марий Элым вуйлатыше коронавирус ваштареш вакцинацийым писештарен колташ задачым шынден
Марий Элым вуйлатыше коронавирус ваштареш вакцинацийым писештарен колташ задачым шынден. Тидын нерген Оперативный штабын заседанийыштыже ойлымо. Александр Евстифеев палемден: вакцинын шапашыжым ситышым ыштыме да правительствын еҥже- влаклан озанлык вуйлатыше, студент, туныктышо- влак коклаште прививке кампанийым чолганрак шукташ кӱштен. Тиддеч посна тӱшка вакцинацийлан йӧным ышташ, поснак кугурак ийготан- влаклан тӱткышым ойыраш кӱлеш манын. Роспотребнадзор виктемым вуйлатыше Светлана Булатован мутшо почеш, черланыше- влак, кислород полышым налше-шамыч шагалемыт. Туге гынат, эпиемиологий лӱдыкшӧ эше аралалт кодеш. Студент- влак очно тунемаш тӱҥалыныт, 65 деч кугурак ийготан туныктышо- влакат пашаш пӧртылыныт. Инфекцийым иктаж-кушеч конден кертыт манме лӱдыкшӧ уло. Сандене вуз- влак Роспотребнадзорын кӱштымашыжым шуктен пашам ыштат. Тазалыкаралтыш министр Марина Панькова палемден: тымарте 16 тӱжемат 600 утла дозо вакцине толын, эше 10 тӱжемат 700 дозо толшаш. Кызыт 6 тӱжем утла еҥ прививкым ыштыктен. Тушечын тӱжемат 300 утлаже тичмаш курсым эртен. Вакцинацийым 19 медицина тӧнеж ышта. Туддеч посна Йошкар-Олаште кудыт да районлаште кок мобильный пункт- влакым почмо. 25 –ше январь гыч 10 медицина тӧнежыште 609 койкым шагалемдыме. Кызыт 8 медицина тӧнежыште 885 койко уло.
