Марий Элым вуйлатыше Российын транспорт министржын икымше алмаштышыже Андрей Костюк дене вашийын
Марий Элым вуйлатыше Российын транспорт министржын икымше алмаштышыже Андрей Костюк дене вашийын. Вашлиймаш Юрий Зайцевын Москош паша дене мийымыже годым эртен. Вашлиймаште республикысе корно комплексын паша лектышыжым, тудым 2023-шо 2024-ше ийлаште вияҥдыме ончыкылыкым каҥашеныт. Мутлан республикыште кугу транспорт объект- влакым чоҥымо да пужен ыштыме, нине проектлаш федерал оксам кондымо нерген ойлымо. Марий Элым вуйлатыше вигак икмыняр инициативым каласен. «Качестван лӱдыкшыдымӧ корно» калыкле проектыште Марий Эл корнын нормативлан келшен толмыжо шотышто эн изи показатель- ик процент дене пашам ышташ тӱҥалын. Кызыт тиде показатель 41 процентыш шуын, а план почеш 35 процент лийшаш ыле. 50 процентыш шуашлан 160 меҥге корным олмыкташ кӱлеш. Тидлан 3,4 луаш миллиард теҥгем ешарен ойыраш кӱлеш,- палемден Юрий Зайцев. Республикым вуйлатыше Йошкар-Ола Козьмодемьянск корным олмыкташ кӱлмӧ нерген ойлен. Марий Элыште кок муниципал образований- Йошкар-Ола округ ден Медведево район кумдыклаште тӧрлымӧ паша писе темп дене кая. Илыме верым чоҥымо пашан вияҥмыже тиде участкыште транспортын шукеммашкыже конден. Транспортын эн шуко коштмо шагатлаште Горький кӱртньӧ корно деч тораште огыл верланыше светофоран корнывож- влак Строитель урем марте транспортым пыкше колтен шуктат. Сандене кок кӱкшытан корно развязкым ышташ кӱлеш. Кызыт суткаште 14 тӱжемат 526 автомобильым колтен кертеш, транспорт шуко годым суткаште 29 тӱжемат 464 автомобильышкат шуэш. Транспортым шукырак колташлан корным пужен ышташ кӱлеш. Тиде инициативым шыҥдараш ме тендан полышланда ӱшанена,- каласен Юрий Зайцев. Участник- влак тыгак шушаш ийын калыкым уэш шупшыкташ тӱҥалаш манын, Йошкар-Ола аэропортын терминалжым чоҥымо да чоҥештен кӱзымӧ да волен шичме полосам ик жапыштак ыштыме йодышым каҥашеныт.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
