Йошкар-Олан мэрийже кок У ий кожым вераҥдаш шона
Йошкар-Олан мэрийже кок У ий кожым вераҥдаш шона. Ола администраций Йошкар-Ола кумдыкым у ий пайремлан сӧрастараш полышым пуэн кертшым кычалеш. Мэрий тиде пашалан ик миллионат 400 утла тӱжем теҥгем кучылташ ямде. Тиде сӧрастарымашке мо пура? Ленин площадьыште 25 метр кӱкшытан кож дене подиумым вераҥдымаш. 424 искусственный укшым латик ярусан каркасыш вераҥдыме годым 681 деталь кучылталтеш. Тиде стойка, опора, переходник, ярус-онго, крепёж, трос ушем- влак. Тышке тӱжемат 310 болт, тынарак гайке да тынарак шайбе пижыкталтеш. Укшлашке 800 кож шарым сакалаш кӱлеш. Баннер стяг- влак Оболенский-Ноготков площадьыште, Комсомольский ден Машиностроитель уремлаште Шкетан театр пырдыжеш вераҥдыме лийыт. А кокымшо кожшым Эшкинин урем дене Ленин проспект ушнымо оҥго кӧргеш шогалтат. Тыгак латик ярусан каркасым погаш изиш шагалрак 581 деталь кучылталтеш. А кож шарже шукырак лиеш- 950 штук. Кож- влакым 17-ше декабрь марте поген шуктышаш улыт, а шушаш ийын 22-шо январьыште рончаш тӱҥалыт.
Фото: Пётр Васильев.
Фото: Пётр Васильев.
