Эрла ВДНХ-ште «Россия» выставке-форумышто Марий Эл Республикын кечыже палемдалтеш
Эрла ВДНХ-ште «Россия» выставке-форумышто Марий Эл Республикын кечыже палемдалтеш. Кумда программылан икмыняр площадкым кучылтыт. Нунын кокла гыч иктыже- Россий социал аралтыш да паша министерствын павильонжо. Тушто республикысе паша министерствын ямдылыме «Кугурак тукым деке почёт да пагалымаш дене. Марий Эл Республике» программыже ончыкталтеш. Тушто регионысо «ший ийготан» активист- влак шкеныштым ончыктат. Мийыше- влак Медведево район гыч «Весела кумыл» фольклор ансамбльым ончат, Волжск ола гыч социал обслуживанийын комплексный рӱдерын специалистше Валерий Дёмин марий тӱран «Крупеничка-аралтыш» шотышто мастар-классыште лийын кертыт. «Мурышо шӱм- влак» усталык коллектив марий кундем нерген муро- влакым пӧлекла. Юринысе «Красота и грация» клубым вуйлатыше Лариса Кондрашова фитнес дене мастар-классым эртара. Звенигово гыч соцобслуживаний рӱдерым вуйлатыше «Марий матрёшкым» сӱретлыме шотышто мастар-классым ончыкта. Фотосӱретче Иван Речкин «Позирований сымыктыш» мастарлыкым ончыкта. Кидпаша мастар- влак Шернур гыч Лидия Веткина ден Морко кундем гыч Антонида Афанасьева марий тӱрым тӱрлаш, марий ӱштым пидаш туныктат, марий йӱла нерген каласкалат. Тыгак марий калык модмаш дене палдарымаш лиеш. «Дебют» бальный куштымаш ансамбльым вуйлатыше Анна Соколова марий куштымаш дене мастар-классым ончыкта, «Вдохновение» усталык коллектив куандара. Тиддеч посна уна- влакым Ӱяча, иван- чай, мӱй дене сийлаш тӱҥалыт.
Фото: Республикысе паша министерстве.
Фото: Республикысе паша министерстве.
