Марий Элысе Ӧрша эҥерыште гидроузелым олмыктымо

Марий Элысе Ӧрша эҥерыште гидроузелым олмыктымо
              Марий Элысе Ӧрша эҥерыште гидроузелым олмыктымо. 2022-шо ийыште Оршанке посёлкышто гидроузелын плотинажым вӱд мушкын да автомобиль корно ужашыште мланде полотном шалатен. Марий Элым вуйлатышын решенийже дене гидроузелым капитально олмыкташ республикын бюджетше гыч 138 миллион утла теҥгем, муниципал казна гыч ныл миллион утла теҥгем колтымо. Теҥгече Оршанке районыш мийымыже годым Юрий Зайцев олмыктымо пашам шуктымо деч вара гидротехник сооруженийым ончен лектын. Ӧрша эҥерыште гидроузел социал кӱлешан объект улеш. Вӱдаралтышыже посёлкышто тул ваштареш кучылтшащ ик водоем гына, плотина ӱмбач пыштыме автомобиль корныжо Оршанке районысо рӱдӧ эмлыме верыш намия. Объектыште пашам шуктымо годым рашемдыме: вӱд пундашыште йошкын шуко погынен, вӱд шагалемын да шудо кушкын. Сандене вӱд пундашым правительствын резерв фонд оксаже кӱшеш эрыкташ лийме. Тыге Оршанке посёлкысо шым тӱжем наре еҥлан экологий йӧным саемдыме. Чылаже 142 тӱжем кубометр йошкыным эрыктен лукмо Пашан акше 15 миллион теҥгеш шуын.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски