Марий Элыш гастрофестивальыш уло Россий гыч турист- влак толыт
Марий Элыш гастрофестивальыш уло Россий гыч турист- влак толыт. Нигунам лийдыме кугытан гастроном фестиваль республикыштына августышто лийшаш. Регионым виктарыме рӱдерыште эртыше вияш эфирыште спорт-туризм министр Лидия Батюкова республикыште турист отрасльым вияҥдыме нерген ойлен. Тудо каласкален: тений кочкыш сийым ончыктышо кугу фестиваль лийшаш. Тушко чыла районат ушна. Тӱҥ площадкыже Йошкар-Олаште лиеш. Мероприятийын лӱмжӧ ден логотипшым калык дене пырля ямдылаш шонат. Мемнан ныл бренд- кӱсле, кравец, подкогыльо, шернур сыр гыч кумытшо мемнан гастрономийыш пура. Сандене туризмын ончыкылыкшо- гастрономий туризм дене кылдалтеш, - каласен Лиди Батюкова. Республикышке турист- влакым кумылаҥдаш манын лишыл жапыште вӱдышӧ федерал телеканаллаште Марий Эл нерген икмыняр передаче лекшаш. Тиде- «Шкенан- влакын илышышт», «Каена-кочкына», «Кундем мучко кудалыштына», «Повар- влак орава ӱмбалне». Мут толмашеш кодшо ийын республикышкына 900 тӱжем наре турист ден экскурсант толын каен. Тидыже пандемий деч ончычсо показатель дечат шукырак. 2019-ше ийыште 813 тӱжем еҥ толын коштын. Лидия Батюкова эше кугурак планым ышта: элнан кажне еҥже кеч ик гана республикыш толын кайышаш. Вашлиймаште тыгак ял туризмым вияҥдыме, гид- влакым аттестоватлыме, турист инфраструктурым вияҥдыме нергенат мутланыме.
Фото: Марий Элын ЦУР-жо.
Фото: Марий Элын ЦУР-жо.
