Йошкар-Олан историй тоштерже шкежат кугу историян
Йошкар-Олан историй тоштержым уэмдаш шонат. Тудо Чулков усадьбын ончычсо зданийыштыже верланен. Кызыт тудо республике кӱкшытан тӱвыра поянлык объектлан шотлалтеш. Кермыч гыч чоҥымо ик пачашан флигель ден кок пачашан тӱҥ пӧртшым 1910-1911-ше ийлаште лесопромышленник Трофим Чулковын усадьбыштыже Царевококшайскын Вознесений уремыштыже чоҥымо. Нуным тӱҥ фасад- влакын линийышт дене пу капка- влак дене ушымо. Кермыч флигельже сатум аралыме клат лийын. Кермыч зданий- влак воктене пу гыч ыштыме мезонинан ик пачашан пӧрт шога. Тудым 1908-ше ийыште чоҥымо. Мезонинан пу пӧрт флигель маналтын. Тушто земский вуйлатыше, палыме поэт Александр Котомкин илен. Кызыт тиде пу пӧрт илыме верлан шотлалтеш. 1977-ше ийыште силикат кермыч гыч ик пачашан зданийым ешарен чоҥымо. Тушто санузел ден котельный верланат. 1996-шо ийыште кугу олмыктымо пашам шуктымо. Тудо ийынак шыжым Олан историйже тоштерым почмо. Кызыт историй зданийым арален кодаш олмыктымо да тӧрлымӧ пашам ышташ проект документацийым ямдылаш тӱҥалыт.
Фото: Павел Стариков.
Фото: Павел Стариков.
