Марий паркым тӱзландарыме пашам умбакыжат ышташ тӱҥалыт

Марий паркым тӱзландарыме пашам умбакыжат ышташ тӱҥалыт
          Йошкар-Оласе Марий паркым тӱзландарыме пашам умбакыжат ышташ тӱҥалыт. «Муниципал заказын дирекцийже» тӧнеж Марий паркым тӱзландарыме пашам шукташ закупкым увертарен. Контракт почеш вӱдым йоктарен колтымо пашам, вертикаль планировкым, террасный оҥа дене площадкым ыштышаш улыт. Ойпидышын тӱҥалтыш эн кугу акше 12 миллион теҥге.
           Проект документаций дене келшышын паркыште 624 квадрат метр тӱшка кумдыкан террасный оҥа дене ыштыме площадке- влак лийыт. Нуно кажне районын стендше- влактене асфальтироватлыме кумдык воктене вераҥдалтыт да кугу мероприятий- влакым эртарыме годым жаплан ыштыме сооружений- влакым вераҥдаш келыштаралтыт.
           Проект почеш тыгак лӱҥгалтыш- влак воктене шаргӱан кумыдкым тротуар плитке дене алмаштат. Нунын кумдыкышт 68 квадрат метрыш погына. Тиддеч посна подрядчик кумдыкышто вертикаль планировкым ыштышаш, тидлан тӱжемат пеле кубометр рокым кусара да вӱдым колташ дренаж системым ышта, йолгорно- влак йымач Тазалык аллей могырыш парк деч ӧрдыжкӧ вӱдым колтымо 8 вӱд пуч системым пыштат.
           Тиддеч посна флагшток- влак вераҥдалтыт, 20 тӱжем квадрат метр кумдыкыштыо газоным тӧрлат, кугу сценым пужен ыштат: леведышлан кӱртньӧ конструкций- влакым 580 миллиметрлан нӧлталыт, керамик кермыч дене пырдыжым оптат, монолит тошкалтышым ыштат да у йошкар да сур тӱсан брусчаткым шарат. Пурымо капкан цокольжым рӱдаҥдыме вурс дене комыжлат, тошкалтыш- влакын саварыштым вераҥдат. Подрядчик чыла пашам 5-ше июнь марте ыштен шуктышаш. Пашалан вич ий гарантийым пуат.
            Фото: Августа Романова.

Прошлые выпуски