Марий театр- Араб Эмиратыште
Эрик Сапаев лӱмеш опера да балет академический марий кугыжаныш театрын пӱтынь труппыжо Араб Эмиратысе Дубай олаш гастроль дене каен. Неле эпидемиологий ситуацийым ончыде, нуно каен кертыныт. Миен шумеке, тестым эртеныт. Чылажынат отрицательный лийын. Артист- влак икмыняр кече отельыште карантиныште лийыныт. Вара репетицийым эртараш тӱҥалыныт. Дубайысе опера театрын сценыштыже марий артист- влак 4-ше гыч 9-ше февраль марте кум спектакльым ончыктат. Тиде: Аданын «Жизель» балетше, Вердин «Аида» да Бизен «Кармен» оперышт. Мемнан театр икымше гана тыгай кугу состав дене Дубайыш гастроль дене каен.
