Марий телевиденийыште- пайрем

Марий телевиденийын икымше передачым эфирыш лукмыжлан 60 ий теме. Таче мемнан ГТРК-ан пӧртышкыжӧ кугу уна- влак толыныт: Марий Эл Правительстве председательын икымше алмаштышыже Михаил Васютин, Эл кӧргӧ политике, верысе самоуправленийым вияҥдымаш да юстиций министр Михаил Данилов, республикын министрже Николай Коротков да тӱвыра, печать да калык- влакын пашашт шотышто министрын алмаштышыже Галина Ширяева. Нуно коллективым кугу лӱмгече дене саламленыт да шке усталык пашашт дене ойыртемалтше-влаклан наградым кучыктеныт. Йӱк режиссёр Елена Малинина Марий Эл тӱвыран сулло пашаеҥже лийын. Радион корреспондентше Диляра Никитина республикым вуйлатышын тауштымашыже дене палемдалтын. Ятыр еҥ таче ВГТРК-ам вуйлатыше Олег Добродеевын кидшым пыштыман наградым кучен. Тиддеч ончыч Республикым вуйлатыше Александр Евстифеев Марий телевиденийым ыштымылан 60 ий теммылан «Марий Эл» ГТРК-н коллектившылан саламлымашым колтен ыле. 1960-шо ий 15-ше августышто Йошкар-Оласе студий гыч икымше переадче эфирыш лектын. Тудо жап гычын Республикысе калыкын илышышкыже телевидений пеҥгыдын да йӧршешлан пурен. Тиде жапыште телерадиокомпаний регионысо вещанийыш кугу надырым пыштен, ончышо- влакын ӱшаныштым сулен налын да республикысе СМИ кокла гыч ик эн авторитетный лийын. Тендан тематик материалда- влак чын да рашлык дене ойыртемалтыт. Коллективын ыштыме программе, сюжет, репортаж да видеоочерк- влак чӱчкыдын конкурслаште сеҥышыш лектыт да Российысе, Тӱнямбал телевизионный фестивальлаште Марий Элым чапландарат. Ӱшанем: поян опыт да кугу усталык куат ГТРК-н коллектившылан республикысе увер кумдыкышыто ончыл верым арален кодаш полшат,- ойлалтеш республикым вуйлатышын саламлымашыштыже.

Прошлые выпуски