Марий Турек районышто шурным коштымо комплексым да пырчым шуко жап аралыме клатым чоҥат

          Марий Турек районышто шурным коштымо комплексым да пырчым шуко жап аралыме клатым чоҥат. Районысо ик вӱдышӧ ял озанлык предприятий- «Колос» агрофирме- ӱдымӧ кумдыкым ешараш шона. Предприятийын куатшым республикым вуйлатышын пашажым шуктышо Юрий Зайцев аклен. Агрофирмын директоржо Марсель Мухаметовын мутшо почеш озанлык 2004-ше ий гыч вияҥаш тӱҥалын. Тений ӱдымӧ кумдыкшо 12 тӱжем гектарым эртен, 700 вуй наре тӱкан шолдыра вольыкшо уло. Тушеч 230-жо- ушкал. Кызыт конвеер сушилкым вераҥдат, да ямдылыме пырчым аралаш клатым чоҥат. Озанлыкыште 55 еҥ тырша, тургым жапыште моло пашаеҥымат ӱжыт, студент ден тунемше- влакат ушнат. Юрий Зайцев палемден: вияҥме жапыште озанлык сай кушмашым ончыктен, ончыкыжымат тудо вияҥаш, паша лектышым кугемдаш тӱналеш манын ӱшаным каласен. 
             Фото: Марий Элым вуйлатышын организаций да аналитик виктемже.

Прошлые выпуски