Советский посёлкышто рӱдӧ скверым умбакыже тӱзландарат

           Советский посёлкышто рӱдӧ скверым тӱзландарыме пашан кокымшо йыжыҥже сентябрьлан мучашлалтшаш. Тудым 2021-ше ий годсек «Оласе йӧнан кумдыкым ыштымаш» регионысо проект почеш олмыктат. Проектын тичмаш акше 25 миллион нере теҥгеш шуэш. Проектым кум йыжыҥлан шелме. Кодшо ийын йолын коштмо верыште свето-динамичный фонтаным да тротуар корным ыштыме. Тыгайже республикыште икте гына. Тений тротуар плиткым оптымо, паркысе понарым да теҥгыл диваным шындыме. Кызыт ротондым ыштат, кумдыкым тӱзландарат, Вай-Фай зоным ыштат. Тиде пашам сентябрьлан мучашлаш шонат. Шушаш ийын тротуар корно- влак ышталтыт да ешартыш тулым пуртат. Ончыкылык план шотышто ойлаш гын, проектым ямдылыме. Тудо Рӱдӧ площадь деч тӱҥалын, Тӱвыра пӧрт ончылсо площадке марте кумдыкым авалта. Тиде проектым 2030-шо ий марте шыҥдараш палемдыме. Тидын нерген Юрий Зайцевлан районыш мийымыже годым ойленыт.
              Фото: Денис Речкин.

Прошлые выпуски