Медведевыште тений у школым чоҥаш тӱҥалыт

Медведевыште 825 верлан у школым тенияк чоҥаш тӱҥалыт. Тидын нерген республикым вуйлатыше Александр Евстифеев Медведево районыш паша дене мийымыж годым увертарен. Школ Киров уремыште, чоҥалтше у илыме комплексыште, верлана. Тудо Йошкар-Оласе 9-ше В микрорайонышто чоҥалтше школ семынак типовой проект почеш ышталтеш. Республикым вуйлатыше тыгак чоҥалтше у йоча садым ончен лектын. Тудо 320 верлан келыштаралтын. Тушто йоча- влакым шуараш мо кӱлеш- чыла ыштыме лиеш. Александр Евстифеев тыгак Правительствын экономический блокшым вуйлатыше- влак дене пырля «Феррони» предприятийын цехлаштыже лийын. Тиде завод кӱртньӧ омсам лукмо дене республикыште гына огыл, Российыштат ончылно кая. Директорын мутшо почеш, тӱнямбалне визымше верым айла гын, Российыште- икымшым. Кӱртньӧ омса- влак тӱнямбалсе 28 элыш колталтыт. Суткаште вич тӱжемат 500 омса ышталтеш, кодшо ийын 965 тӱжемым лукмо. Паша дене мийыме вес верже- Медведевысе историко- художественный тоштер. Тушто 12 тӱжем наре экспонат аралалтеш. Идалык мучко тушто 900 наре мероприятий эртаралтеш, нуным 15 тӱжем наре еҥ онча.

Прошлые выпуски