Мер пашаеҥ- влак регионлаште школлам капитально олмыктымо пашан кузе кайымыжым каҥашеныт
Мер пашаеҥ- влак регионлаште школлам капитально олмыктымо пашан кузе кайымыжым каҥашеныт. Россий Федерацийын просвещений министерствыштыже ача-ава мер контрольын федерал да регионласе штабыштын кумдаҥдыме заседанийышт эртен. Министр Сергей Кравцов палемден: тунемаш, туныткымо инфраструктурым вияҥдаш кызытсе жаплан келшыше да чапле йӧным ыштыме шотышто кугу задаче шога. Нуным шыҥдарымашке мер калыкымат ушымо. Нуно программын кузе шукталтмыжым, качествыжым тергат да жапыштыже шижтарен шогат. Заседанийыште Марий Эл гыч ача-ава- влакын мер контрольыштын республикысе штабшым вуйлатыше Мария Шавкунова участвоватлен. Тудын мутшо почеш, регионысо штаб школлам капитально олмыктымо пашам контрольышто куча. Тергымаш ончыктен: пашаште кӱрылтмаш лийын огыл. Ятыр школжо муниципал штабла дене сай кылым кучат. Тений куд школым капитально олмыктат. Программе олмыктымо паша дене гына ок чарне, а школым кумдан вияҥдыме пашамат уша: оборудований налалтеш, туныктышо- влакын квалификацийышт нӧлталтеш. Тидыже туныктымо пашалан у, чапле йӧным ышташ полша. Олмыктымо пашам, кӱлешым налмым да пойдарымым мер контрольын республикысе да муниципал ача-ава штаб- влак эскерен шогат.
