Звенигово районысо рӱдӧ эмлыме вер паллиативный полыш кабинетым почаш ямдылалтеш

           Звенигово районысо рӱдӧ эмлыме вер паллиативный полыш кабинетым почаш ямдылалтеш. Курык марий район гыч Юрий Овсюк Санчурскысо медучилищым тунем пытарымеке Козьмодемьянскысе вашке полыш станцийыште фельдшерлан пашам ышташ тӱҥалын. Армий деч вара тушкак пӧртылын да лу ий тыршен опытым поген. Вара ешыже дене Звенговышко илаш кусненыт. Кум ий ончыч Шемшӱргӧ ФАП-ыште ышташ тӱҥалын.
            Шошым тӱҥ врач районысо калыклан паллиативный полышым пуаш ямдылалташ темлен. Тыгай черан кажне еҥым рашемден, спискым ышташ кӱлын. Тыге тудо каныш кечылаште яллашке, эн тора илемлашкат коштын, эмлаш лийдыме черан еҥ- влакын спискыштым терген, ятыр уверым поген. Тӱҥжӧ- рашемдаш кӱлеш ыле: ялысе калыклан аҥышыр специальностян врач- влакын консультацийышт, корштымым лыпландарыше эм кӱлеш мо?
             Тидат рашемын: чыла черле- влак обезболивающий препаратым налаш лийме нерген огыт пале. Южгунам диагнозыштымат огыт шинче, эмлаш лийдыме улмышт нерген лишыл еҥышт огыт ойло. Тыге корштымым чарыше эмым налде, чытен илат. Кызыт эмлыме вер автомобиль- влакым налын. Нунын полшымо дене черле- влакым тора ялла гычат аҥышыр специальностян врач- влак деке консультацийыш кондаш лиеш. Юрий Овсюк кызыт паллиатив шотышто шинчымашыжым келгемда. Лишыл жапыште эмлыме верыште паллиативный полыш кабинет почылтшаш. Тушто паллиативный полышым вучышо районысо чыла черле нерген увер чумыралтеш.

Прошлые выпуски