Моско олаште «Талукын ешыже» Россий кӱкшытан конкурсым иктешлыме
Моско олаште «Талукын ешыже» Россий кӱкшытан конкурсым иктешлыме. Тудо ынде визымше гана «Мыйын ешем- мыйын Россием» ӱжмаш дене эртен. Конкурс вич номинаций дене эртаралтеш. Регионласе йыжыҥ деч вара федерал кӱкшытыш 83 регион гыч 342 йодмаш пурен. Марий Эл гыч кок еш «Ялысе еш» да «Еш- йӱлам аралыше» номинацийлаште сеҥышыш лектын. Икымше номинацийыште Шернур район гыч Иван ден Светлана Малининмытын ешашт ойыртемалтын. Нуно 27 ий пырля илат да кок ӱдыр ден ик эргым ончен-куштат. Вес номинацийыштыже Волжский район гыч Алексей ден Екатерина Кудрявцевмытын ешышт ончыко лектын. Нунын вич йочашт уло: ныл эрге да ик ӱдыр. Лауреат- влакым шыже мучашыште Москошто саламлаш тӱҥалыт. Кызыт конкурсын лектышыже почеш Калыкле летопись книга ямдылалтеш. Тудо кок книга гыч шога. Иктыштыже сеҥыше еш- влакын историйышт, весыштыже конкурсыш ушнышо чыла участник нерген увер чумыралтеш.
