Уста писатель мемнам коден кайыш…
Теҥгече Марий Элын калык писательже, Эстонийысе родо-тукым калык-влак Программын сылнымут премийжын лауреатше Мария Илибаева илыш дене чеверласен. Тудо 20-шо октябрьыште 70 ийым тема ыле. Мария Каликаевна Пошкырт велысе Балтач район, Туктай ялыште шочын. Куженер районышто школышто туныктен, «Марий Эл», «Кугарня» газетлаште пашам ыштен. Икымше произведенийже 1972-шо ийыште савыкталтын. Ойлымаш да повесть- влакым возен. Вара «Кечан ӱмылыштӧ» романже, «Вес тӱняшке ямдылалтмаш» кум книган романже савыкталт лектыныт. 2000-ше ий гыч Российысе писатель- влак ушемын еҥже. Мария Каликаевна мемнан марий радио денат пеҥгыде кылым кучен. Икмыняр мыскара ойлымашыже радион фондыштыжо аралалтеш. Тудын нерген поро шарнымаш курымеш мемнан шӱмешна кодеш. Мария Илибаевам шочмо кундемыштыже тоят.
