Неле черым сеҥымаште ме пырля улына! - ойла Светлана Солнцева

Неле чер ваштареш кучедалме шотышто калык деке ӱжмаш дене Кугыжаныш Думын депутатше Светлана Солнцева лектын. Тудо воза: Марий Элыште илыше пагалыме калык! Коронавирус  инфекцийлан кӧра ме чыланат мӧҥгыштӧ шинчышаш улына, неле черлан шарлаш эрыкым пуышаш огынал. Уремышкат амал деч посна огына лек, самоизоляций режимым тÿткын шуктымо дене шкенам да пошкудына-влакым чер деч арален коден кертына. Тиде кÿлешан пашаш шуко еҥ шке кумылын ушнен. Волонтер ден поро чонан самырык-влакым палемден кодынем. Кугу ийготан, черле да инвалид-влаклан таче нунын полышышт деч посна йӧсӧ. Медицине пашаеҥ-влак коронавирусым сеҥымаште эн ончылно, лÿдыкшӧ верыште улыт. Нунын моштымашышт, шинчымашышт да писылыкышт дене мемнан тазалыкна веле огыл, пÿтынь илышна кылдалтын. Пагалыме йолташ-влак, неле черым сеҥымаште ме пырля улына! Профилактике мерылан кӧра йӧндымылыкым шижына гынат, ик жапым чытена, шонем. Шкенан тазалыкнам чылан пырля аралена манын ÿшанен кодам!- ойла Россий Кугыжаныш Думын депутатше Светлана Солнцева.

Прошлые выпуски