Олтымо тургымлан ямдылалтмаш
Йошкар-Олаште рӱдӧ олтымо системан пӧрт-влак у олтымо тургымлан 96 процентлан ямде улыт.
Олан мэржым сомылжым жаплан шуктымо Антон Трудинов виктарыше кампаний ден ТСЖ-влакым чыла пашам 10-шо сентябрь марте мучашлаш да объект-влакын ямде улмышт нерген паспортлан кӱлеш документым администрацийышке колташ йодын.
Игече йӱкшемдыме дене олтымо тургымым тӱҥалме йодыш шукыштым тургыжландара. Тений тудым сентябрь мучаш – октябрь тӱҥалтышлан палемдыме. Закон дене келшышын, уремыште южын температурыжо 5 кече почела 8 градус деч кӱшкӧ огеш кӱзӧ гын, шокшым пачерлашке пуаш лиеш. Социальный тӧнеж-влакым эррак олташ тӱҥалыт.
