Увер деч посна йомшылан шотлалтше 400 утла салтакын пӱрымашыжым рашемдыме

ОНФ-ын чолга еҥже- влак да «Демос» кычалше отрядын боецше- шамыч увер деч посна йомшылан шотлалтше республикыште шочшо 400 утла салтакын пӱрымашыжым рашемденыт. Нуно Кугу Ачамланде сар жапыште фронтыш кайыше да увер деч посна йомшо  военнопленный- шамычын немыч да финн учёт документыштым шымлен лектыныт. Кычалме паша мучашлалтын огыл. Тудо «Плен гыч пӧртылаш» проект кышкарыште Президент грант фондын полышыж дене умбакыже шуйна. 1941-ше 1945-ше ийлаште немыч да финн пленыште ӱмыр лугыч лийше тӱжем утла салтакын пӱрымашыжым рашемдаш палемдыме. Чыла лӱмым «Шарнымаш книгаш» пуртымо лиеш, - каласен «Демос» отрядын командирже Дмитрий Шипунов. Салтак- влакын родо-тукымыштлан учёт документын да фотосӱретын копийыштым пуэн кертыт. Мутлан Шернур районысо Шокшем Памаш ялыште шочшо младший лейтенант Сергей Паймаковын илыш корныжо рашемын. 1941-ше ийыште тудын служитлыме дивизий Вязьма ола лишне окруженийыш логалын да пӱтынек манме гаяк пытен. Офицер Германий кундемысе ик эн кугу Шталагыш логалын. Пленыште ӱмыр лугыч лийын. Лагерьысе номержат пале. Республикысе шарнымаш книгаште 40 тӱжем утла пӧртылдымӧ салтак увер деч посна йомшылан шотлалтеш. Нунын авашт але пелашышт уверым вучен шуктен огытыл гын, икшывышт да уныкашт лишыл еҥышт нерген чыным пален налын кертыт,- ешарен Дмитрий Шипунов.

Прошлые выпуски