Тений ялысе шым школышто спортзалым уэмдат
«Образование» калыкле проект да «Кажне йочан сеҥымашыже» федерал проект кышкарыште ялласе да изи олаласе школлаште шым спортзалым олмыкташ тӱҥалыт. Тиде пашалан федерал бюджет 17 миллион теҥге оксам ойырен. Килемар районысо Нежныр школын спортзалжым «Орион» чоҥышо компаний» олмыкташ тӱналеш. Тушто вӱдым ситарыме да йоктарен колтымо системым, волгыдым пуымо да ырыктыше оборудованийым ачалаш, омса ден окнам вашталташ палемдыме. Кӱварым уэш шарат, санузел- влакым олмыктат. Тиде пашалан кок миллион теҥге кайышаш.
