Полномочный представитель округысо вич кундемыг вуйлатышышт дене совещанийым эртарен
Россий Президентын Юл кундем округышто полномочный представительже Игорь Комаров вич кундемым: Марий Эл ден Мордовийым, Пермь крайым, Киров ден Оренбург областьлам вуйлатыше- влак дене эмлыме верлаште пашаеҥым ситарыме, нунылан аралыме средствым жапыштыже кондымо эмым шапашлыме йодыш- влакым каҥашен. Тыгак коронавирус дене черланыше- шамычлан верым ямдылыме да резерв верым ыштыме нерген ойлымо. Александр Евстифеев республикыште ыштыме мера- влак нерген каласкален. Совещаний видеоконференцкыл йӧн дене эртен. Республикым вуйлатышын мутшо почеш, утларак черым пален налаш манын, тестирований эртаралтеш. Тымарте 14 тӱжемат 500 шымлымашым эртарыме, эртыше суткаште гына 726 тергымашым ыштыме. 7 медицина тӧнежыште 470 койко уло. А ямдылышаш улына ыле 340 койкым, мемнан 130 верлан шукырак. ИВЛ аппарат шотыштат норматив марте шуына. Черле- влаклан медицина полышым пуаш 272 миллион теҥгем ойырымо. Кадрым ситарыме нергенат ушештарен. Черле- влак дене пашам ышташ шым тӱжем медицина пашаеҥым ямдылыме. 36 ординатор республикыш пӧртылын. Апрельлан кумылаҥдыме оксам тӱлымӧ лиеш. Ик гана чийышаш вич тӱжем костюм, 215 тӱжем маске, ныл тӱжем респиратор уло. Тиде йодышым виктарен колташ полномочный представитель полшен.
