Республикысе полиций пашаеҥ- влак шылын коштшо 17 еҥым кученыт
Республикысе полиций пашаеҥ- влак суд да следствий деч шылын коштшо 17 еҥым кученыт. Эл кӧргӧ паша министерствыште март кыдал гыч эртыше «Розыск» оперативно- профилактик мероприятийым иктешленыт. Тудын кышкарыште шылын коштшо 17 еҥым кученыт. Полиций пашаеҥ- влак увер деч посна йомшо, колышо да палыдыме еҥым рашемдыме, осал пашам ыштыше да суд ден следствий деч шылын коштшо еҥ- влакым кычалме шотышто пашам писештарен колтеныт. Ведомствын пресс-службыжын увертарымыж почеш, мероприятий деч ончыч пашаче группа кычалме еҥ- влакын спискыштым налын. Тиддеч посна интерпол канал дене генеральный секретариатыш, Украиныш, Египтыш, Ливаныш, Турцийыш, Грузийыш йодмаш- влакым колтымо. Тыге кучымо 17 еҥ гыч нылытше суд деч шылын, федерал кычалмаште лийыныт, кумытшым петырыме. Рейд жапыште вес кундемлашкат лектын коштмо. Тыге вич еҥым верештме. Кумытшым- Чувашийыште, иктыжым- Киров областьыште, Индийын гражданинжым Моско областьыште кучымо. Ик еҥым Озаҥысе ДПС сотрудник- влакын полшымышт дене Татарстаныште чарыме. Тыгак увер деч посна йомшо кум еҥын кушто улмыштым рашемдыме.
