Волжск ола гыч самырык патыр Российын сборный командышкыже пурен
Ингушетийысе Назрань олаште «Магас» спорт полатыште 18 ияш марте рвезе- влак коклаште греко-рим кучедалмаш дене Российын первенствыже лийын. Тушко элысе 60 регион гыч 400 виян атлет погынен. 60 килограмм марте нелытан 49 спортсмен коклаште Волжск ола гыч кучедалше, спорт мастерыш кандидат Данил Григорьев шым вашлиймаш гыч 6-ыштыжо сеҥышыш лектын да той медальым сеҥен налын. Тудын туныктышыжо- влак: Российын сулло тренерже Александр Серяков ден спорт мастер Александр Феоктистов улыт. Тиде лектыш спортсменлан Российын сборный командышкыже пураш йӧным ыштен.
