Республикысе изи да кыдалаш бизнесын оборотшо 166 миллиард теҥгем эртен

                       Эртыше ийыште Республикысе изи да кыдалаш бизнесын оборотшо 166 миллиард теҥгем эртен. Маристат нунын кодшо ийысе пашаштлан иктешлымашым ыштен. Изи да кыдалаш  предпринимательство республикын экономикышкыже шинчалан койшо надырым пышта, калыклан пашаверым почеш, сату да полышым ситара. Тенийсе икымше январьлан шотлымаште кундемыштына 67 кыдалаш предприятий, 799 изи да 6 тӱжемат 653 микропредприятий шотлалтын. Изи да кыдалаш предприятий кокла гыч 78 процентше Йошкар-Олаште регистриоватлалтын. Кодшо ийын тушто 45 тӱжем утла еҥ пашам ыштен. Тидыже республикысе предприятийлаште ыштыше- влакын чотышт гыч  24 процент лиеш. Кыдалаш предприятийлаште кокла пашадар 37 тӱжем утла теҥге лийын, изи предприятийлаште 25 тӱжем теҥге наре. А республике мучко кокла пашадар 32 тӱжем теҥге шотлалтеш. Нине предприятийлан оборотышт 166 миллиард утла теҥге лийын, але республикысе чыла организацийын оборотшо деч 43 процент. Нине предприятийла гыч 50 процентше ужалкалыме пашам шукта, 21-же обрабатыватлыше производство, кудыт утлаже- чоҥымо паша. Федерал закон дене келшышын кызыт элна мучко изи бизнеслан экономический перепись эрта. Кодшо ийысе паша нерген отчётым тений 1-ше апрель марте пуэн шуктыман.

Прошлые выпуски