Респуликысе курчак театрым саламлена
Республикысе курчак театр «Петрушка великий» 10-шо тӱнямбал фестивальыште гран-при дене палемдалтын. Курчак театр-влакын фестивальышт Екатеринбург олаште эртен. Марий Элысе театр тушко «Йӱд орол» спектакль дене миен да адакат калыкым да жюрим шке постановкыжо дене ӧрыктарен. Марий Эл искусствын сулло пашаеҥже Алексей Ямаевын шындыме тиде спектакльже шошым «Шӧртньо маска» премийлан темлалтын ыле. Но пандемийлан кӧра мероприятий эртаралтын огыл. Тудым шыжылан кусареныт. Тугеже Республикысе курчак театр деч эше ик сеҥымашым вучаш тӱҥалына.
