Российысе спорт министерствыште Юрий Зайцев Республикысе спорт инфраструктурым вияҥдыме йодышым каҥашен
Российысе спорт министерствыште Юрий Зайцев Республикысе спорт инфраструктурым вияҥдыме йодышым каҥашен. Марий Элым вуйлатыше тушто спорт министрын алмаштышыже Одес Байсултанов дене вашлийын. Нуно «Спорт- илышын нормыжо» федерал проектым шыҥдарыме да кӱшыл спортым вияҥдыме нерген ойленыт. Юрий Зайцев ушештарен: регионышто кӱлеш спорт инфраструктура уло, но тидын годымак икмыняр районышто чоҥен шуктыдымо объект- влак шогат. А правительствын задачыже- профессионал да спортым йӧратыше, начар тазалыкан- влак йӧнан зал ден пӧлемлаште спорт, физкультура дене кылым кучен кертышт манын тыршымаш. Пытартыш икмыняр ийыште 32 спорт объектым пашаш колтымо. Тиддеч посна ГТО-м тестироватлыме 20 рӱдер, школ деч ӧрдыжсӧ спортым вияҥдыме рӱдер, виш физкультура да тазалыкым пеҥгыдемдыме комплекс- влак пашам ыштат. Кодшо ийын Йошкар-Ола ден Медведево районышто кум «ушан» площадкылан спорт да технологий оборудованийым налме. Спорт ямдылалтмаш программе дене кызыт республикыште ныл тӱжемат 300 утла еҥ шуаралтеш. Тыгай Юрий Зайцев чоҥен пытараш кӱлешан объект- влак нерген радамын каласкален.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
