Йошкар-Олаште монохром графике ден скульптурын ӧрыктарыше тӱняжым ончыктат
Йошкар-Олаште монохром графике ден скульптурын ӧрыктарыше тӱняжым ончыктат. Специалист- влакын шотлымышт почеш монохромышто уло тӱням ончыкташ лиеш, тудо ойыртемалтше да мучашдыме лиеш. Марий кундемын сулло мастарже- влакын пашашт «Монохром» ончерыш лукталтыт. Тушто Георгий Тайгильдин ден Иван Михайлинын линогравюрыштым, Зосим Лаврентьевын офортшым, Александр Бакулевскийын ксилографийжым, Анатолий Козьминын, Владимир Козьминын, Олег Дедовын, Анатолий Ширнинын скульптура ден барельефыштым ужаш лиеш. Выставкын посна ужашыже Республикын сулло сӱретчыже, Россий сӱретче- влак ушемын еҥже Георгий Тайгильдинын линогравюрыжлан пӧлеклалтын. «Монохром: Тимофей Евсеев лӱмеш калыкле тоштерын фондшо гыч графике ден скульптура» ончер 10-шо февральыште 16 шагатлан калыкле тоштерыште почылтеш.
