Самолёт дене шукырак чоҥештылаш тӱҥалыныт
Йошкар-Ола аэропортышто калыкым шупшыктымаш кум пачаш утлалан ешаралтын. Юж транспортын федерал агентствыштыже тений январь гыч сентябрь марте Российысе аэропортла гоч калыкым шупшыктымо кугытым шымлен лектыныт. Йошкар-Ола аэропорт январь гыч 30-шо сентябрь марте 11 тӱжемат 497 пассажирым наҥгаен. Эн шукыжо январьыште лийын- кок тӱжем наре, эн шагал- апрельыште- 456 еҥ. Тидыже коронавируслан кӧра чарымаш- влакым пуртымо дене кылдалтын. «Марий Элыште авиаций» пабликын ончыктымыж почеш тений индеш тылзыште кум пачаш деч шукырак калыкым шупшыктымо. Ӱмаште кум тӱжемат 122 пассажир лийын.
