Озавате пакчаштыже емыжым поген, а шолыштшо еҥ тудын пӧртыштыжӧ- оксам

Озавате пакчаштыже емыжым поген, а шолыштшо еҥ тудын пӧртыштыжӧ- оксам
Пакчаште але сад-пакчаште пашам ыштыме годым тӱткӧ лийман. Йошкар-Олаште илыше ӱдырамаш сад- пакчаштыже емыжым погымыж годым, пӧртшым тӱкылен огыл. Тиде жапыште сад пӧртшӧ гыч оксажым шолышт каеныт. Кеҥежым шуко еҥ шке жапшым садыште эртара, но пӧртым, сарайым петырыме нерген огытат шоналте. Сандене полиций пашаеҥ- влак лӱдыкшыдымылык правилым эскераш темлат. Пӧрт воктелсе пакчаш лекме годымат омсам сура дене тӱкылаш кӱлеш. Шолышташ лу минут жапат сита. Машина ден велосипедым эре эскерыман, але нуным  левашыш пуртен шындыман. Пакчаште пашам ыштыме годым вургемым кудаш пыштен ида кодо. Поснак кӱсеныштыже окса, документ але телефон уло гын. Шергакан паша ӱзгарым пакчаште шылтен  кодаш ок кӱл, мӧҥгӧ наҥгайыман. Шагал палыме еҥым пашам ышташ полшаш ӱжман огыл. Изиш оксам тӱледа гынат, тудо кушто мо кийымым шекланен кертеш. Иктаж-мом шолыштыныт гын, вигак 102 номерыш йыҥгырташ кӱлеш.

Прошлые выпуски