Шушаш ийын Марий Элыште 48 тӱшка кумдыкым да 29 кудывечым олмыктымо лиеш
Шушаш 2023-шо ийыште Марий Элыште 48 тӱшка кумдыкым да 29 кудывечым олмыктымо лиеш. Теҥгече Россий федерацийын регионлам вияҥдыме шотышто Правительство комиссий Президиумын заседанийыштыже калыкле да федерал проект- влакым илышыш шыҥдарыме нерген ойленыт. Тудым чоҥымаш министр Ирек Файзуллин эртарен. Заседанийын пашаштыже Юрий Зайцев участвоватлен. Республикыште проект- влак график почеш шукталтыт. Мутлан, тений «Йӧнан оласе кумдыкым ыштымаш» федерал проект кышкарыште шке жапыштыже 92 кумдыкым тӱзландарыме. Тиде- 55 тӱшка кумдык да 37 кудывече. Шушаш ийын эше 77 кумдыкым олмыкташ палемдыме. Нунын верч ныл тӱжем наре еҥ йӱкшым пуэн. 59 кумдыкшо шотышто контрактым ыштыме. Тыгак тошто пӧртлам пытарыме, «Ару вӱд», «Юл эҥерым тазаҥдымаш», «Спорт- илышын нормыжо», «Тазалыкаралтышын первичный звеножым уэмдымаш регионысо проектлам, «Илыме вер» федерал проектым илышыш шыҥдарымаште сай вашталтыш коеш. Нине да моло пашам шуктымым Юрий Зайцев шке контрольыштыжо куча.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
