Тений 72 шуко пачеран пӧртым капитально олмыктат
Республикыштына тений 72 шуко пачеран пӧртым капитально олмыктат. Капитально олмыктышаш тӱшка кумдыкшо 214 тӱжем квадрат метрыш шуэш. А пашан акше 573 миллион утла теҥге лиеш. Проект да смета документаций чыла объектланат ямде. Лач тиде темым Марат Хуснуллинын регионлам вияҥдыме шотышто правительство комиссий Президиумын заседанийыштыже канашыме. Тушто Юрий Зайцев участвоватлен. Вице-премьер палемден: илыме вер да коммунал озанлык сферыште йодыш- влак эше кодыт. Сандене регионлаште нуным системно виктараш кӱлеш. Марий Элыште аварийный илыме верлам шагалемдыме шотшто паша радам дене кая, шуко пачеран пӧртлам капитально олмыктат. Капитально олмыктымо программым 2014-ше гыч 2049 ий марте ыштыме. Тудым кум ий дене 12 йыжыҥлан шеледыме, тушко ныл тӱжем шуко пачеран пӧрт пура. Тушто 473 тӱжем утла еҥ ила. Тидыже республикысе калыкын 70 процентше лиеш. 2022-шо ийыште 83 пӧртым олмыктымо. Программым шыҥдарымым Юрий Зайцев шке контрольыштыжо куча.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
