Правительстве пӧртыштӧ короновируслан шарлаш чаракым ыштыме йодышым каҥашыме
Республикым вуйлатыше Александр Евстифеев правительстве пӧртыштӧ тазалыкаралтыш системым вияҥдыме йодышым каҥашен. «Тазалыкаралтыш» калыкле проект кышкарыште шындыме задаче- влакым шуктымо, отрасльын первичный звеножым уэмдыме нерген ойлымо. Посна теме семын республикыште короновируслан шарлаш чаракым ыштыме йодыш каҥашалтын. Эн ончыч, тазалыкаралтыш тӧнеж- влак ямде лийшаш улыт да, кӱлеш лийме годым, чаткан да чолган сомылым шуктыман,- манын палемдыме. Министр Марина Панькован мутшо почеш, медорганизаций- влак полышым пуаш ямде улыт. Кызыт инфекций пӧлка- влак ямдылалтыт, 246 койко вер лийшаш. Но черле шукемме годым тудым 850 марте ешараш лиеш. Маскым, перчаткым, халатым да дезинфицироватлыше средствым, эмым, реанимаций оборудованийым шапашлыме. Кызытеш лач изолироватлыше носилке гына уке. Республикым вуйлатыше тиде сомыллан вигак правительствын резерв фондшо гыч 900 тӱжем теҥгем ойыраш пунчалын. Роспотребнадзор виктемым вуйлатыше Светлана Булатова тӱшкан кочмо да калык погынымо верлаште дезинфекцийым эртарыме нерген ойлен, Китай гыч пӧртылшӧ турист- влак коклаште черланышым рашемдыме огыл манын. Профилактике мероприятий- влак аэропорт ден вокзаллаштат шукталтыт.
