Республикыштына коронавируслан кӧра пуртымо чарымаш- влак шотышто изиш луштарымашым ыштыме
Республикыштына ондак коронавируслан кӧра пуртымо чарымаш- влак шотышто Александр Евстифеев эше изиш луштарымашым пуртен. Оперативный штабын заседанийыштыже Республикым вуйлатыше пашам тӱҥал кертше организаций- вакын спискыштым кугемден. Чарымашым архив паша, физкультура да спорт, фитнес-индустрий аланыште пашам ыштыше организацийла гыч кораҥдыме. Но туштат посна условийым шуктен шогыман. Тиддеч посна шке пашаштым театр ден концерт организаций- влак тӱнал кертыт. Но Роспотребнадзор виктемым шижтарышаш да ончымо залын пелыжым гына айлышаш улыт. Коронавирус дене черланымаш республикыште тӧрем толмо нерген Роспотребнадзор виктемым вуйлатыше Светлана Булатова увертарен. Пытартыш арняште ик суткаште 15-17 еҥын черже пеҥгыдемдалтеш. Пытартыш кок арняште 110-115 тест эртаралтеш, 50 процент койко фонд яра шога. Чыла показатель чарымашым кораҥдыме кумшо йыжыҥлан келшен толеш. Тидын годымак тазалыкаралтыш министр Марина Панькова неле пациент- влакын ятыр толмышт нерген ойлен. Инфекций стационарлаште 280 еҥ эмлымашым эрта. Черланыше- влакын чотышт шагалемеш гынат, стационарыш пыштыме еҥ-влак ешаралтыт. Ме ик цифрыште шогена: медицина организаций- влакын кок арняште теммышт 278 еҥыште кучалтеш. Суткаште 35 еҥ пурен гын, тушеч 80 процентше нелын черланыше улыт. Тидлан моло кундемла гыч канен толшо- влак амалым ыштат, нуно родо-тукымышт, коча-ковашт деке уналыкеш мият. Сандене илалше- влак коклаште тыгай сӱрет палдырна. Республикым вуйлатыше умылтарыме пашам чолганрак эртараш темлен. Роспотребнадзор виктемлан тыгак терген шогаш, тӱшка вер- влакым дезинфицироватлаш кӱштымӧ.
