Ял озанлык министр Александр Гречихо Марий Турек районыш миен

Марий Элын ял озанлык министрже Александр Гречихо шке алмаштышыже Андрей Кондратенко дене Марий Турек районыш миеныт. Нуно район администрацийым вуйлатыше Сергей Решетов ден ял озанлык пӧлкам вуйлатыше Алексей Суворов дене вашлийыныт. Уна- влак Евгений Михеевын фермер озанлыкыштыже да «Акпарс» агрофирмыш миеныт, шурным погымо пашам каҥашеныт, у шурнылан акым пуэныт. Евгений Михеевын озанлыкыштыже кок ушкал вӱда да ик презе вӱта уло. Тушто  тӱкан шолдыра вольык 151 вуй да 78 ушкал шога. Озанлык тӱҥ сомыл семын кушкылым ончен кушта. Тӱжемат 25 гектареш пырчан культурым вераҥдыме: кокияш уржам, шыдаҥым, шожым, шӱльым да пурсам. «Акпарсыште» министр вольык комплексым ончен: кок ушкал вӱтам да ныл презе вӱтам. Тушто тӱжемат 479 вуй тӱкан шолдыра вольыкым да 561 ушкалым ашнат. Тенийсе шым тылзыште тушто 107 тонн шылым, кок тӱжемат 735 тонн шӧрым ыштен налме. Ик суткаште ик ушкал деч 22 килограмм утла шӧрым шупшылыт. Ик ушкал деч лектыш вич тужемат 46 килограммыш шуэш. Пырчан культурым 8 тӱжемат 300 гектареш вераҥдыме, - увертара правительствын пресс-службыжо.

Прошлые выпуски