Врач амбулаторий у пӧртыштӧ лиеш
Врач амбулаторий у пӧртыштӧ лиеш. «Тазалыкаралтышын первичный звеножым уэмдымаш» регионысо проект кышкарыште эртыше ийын республикыште ик объектым чоҥымо- Медведево районысо Краснооктябрьск врач амбулаторийым. Тений ныл объектым чоҥаш палемдыме. Ик кӱлешан объектше Звенигово районысо Кокшайск врач амбулаторий улеш. Кодшо курымысо 50-ше ийлаште чоҥымо амбулаторий тошто, пу пӧртыштӧ верлана. Тушто кӱваржат шӱйын, леведышышкыжат вӱд шыҥа, электровоштыржат куатым ок чыте. Амбулаторийын коллектившым Ижевскысе медицина академийым тунем пытарыше Елена Дмитриева вуйлата. Районышто тудо 2012-шо ий годсек пашам ышта. Амбулаторийыште 10 еҥ тырша, врач- стоматолог, участковый, процедурный, физиопроцедурный медшӱжар-влак, дезинфектор улыт. Нуно Кокшайскысе, Таир, Шемшӱргӧ, Ялпай, Семёновка, Шуйка ял ден полсёлкыласе тӱжемат пеле калыклан полышым пуат. Кодшо ийын ик автомобильым налыныт. Тидыже тора ялла гыч калыкым тергаш кондаш йӧным пуэн. Ынде у кремыч зданийым чоҥымым вучат. Тений тыгак Силикатный амбулаторийым, Тат-Китне ФАП-ым, Юрино эмлыме верын поликлинике пӧлкажым чоҥышаш улыт. Тиде пашалан 374 миллион теҥгем колташ палемдыме.
