Йошкар-Олан тӱрыштыжӧ Кугу Чигаш уремым олмыктат
Йошкар-Олан тӱрыштыжӧ Кугу Чигаш уремым олмыктат. Кокшайск корно деч Крылов урем марте машина коштмо корным да тротуарым олмыкташ 55 миллионат 482 тӱжем утла теҥгем кучылташ палемдыме. Кызыт торгым увертарыме, тудын лектышыже почеш подрядчикым рашемдыме лиеш. Ыштышаш пашашке мо пура? Трассым тӧрлымаш да пеҥгыдемдымаш, канализаций вынем- влакым пужен ыштымаш, бордюр кӱым вашталтымаш да вӱдым колтышо пучым олмыктымаш, асфальтым шарымаш, газоным тӧрлымаш, машина корнышто разметкым ыштымаш да корно пале- влакым вераҥдымаш. Тиде урем ятыр ий дене начар улмаш. Но 2022-шо ий мучаште 55-П номеран маршрутым колтымеке лакылаш тыгыде кӱм оптеныт. Но ик ий гыч транспортлан кошташ йӧрыдымыш савырнен да автобус пурымым чарнен. Верысе калык тиде йодышым республикым вуйлатыше дене вияш эфирыште нӧлталын. Республикым вуйлатыше тений тиде корным олмыктымо лиеш манын ӱшандарен каласен.
Фото: «ВНД».
Фото: «ВНД».
