Йошкар-Олаште Ачамландым аралыше- влакын скверышт шочын
Йошкар-Олаште тыгак Ачамландым аралыше- влакын скверыштым торжественно почмо. Тыгай лӱмым Машиностроитель уремын Свердлов деч Йошкар Армий урем марте ужашыжлан пуымо. Тӱналтышым оласе мер да патриот организаций- влак ыштеныт. Нуно рӱдӧ олаштына герой- влакым шарналтыме, тӱрлӧ патриотизм мероприятий- влакым эртарыме, самырык тукымым эл верч кугешныме шӱлышеш шуарыме вер лийже манын тыршеныт. Теве Ачамландым аралышын идалыкыштыже тиде шонымаш шукталтын. Мэрийыште ойлымо почеш, у сквер улшо патриотизм кумдык дене лач келшен толын. Тудым моряк да теҥыз пехотинец- влаклан чапле стела сӧрастара. Воктенак Воин пограничник- влаклан, Воин десантник- влаклан сквер верланеныт, тораште огыл Сеҥымаш парк ден Сеҥымаш бульвар, Воин Чап монумент улыт. Тиде героизм шӱлыш дене шыҥдаралтше ойыртемалтше маршрут, вуйым савыме, историй шарнымашым арлыме вер лиеш манын ӱшанат.
Фото: Йошкар-Ола мэрий.
Фото: Йошкар-Ола мэрий.
