Йошкар-Олаште ик лицейым кугу вашталтыш вуча

Йошкар-Олаште ик лицейым кугу вашталтыш вуча
                Йошкар-Олаште ик лицейым кугу вашталтыш вуча. Александрова лӱмеш 11-ше номеран лицейын тӱҥалтыш школжылан ешарен ныл пачашан зданийым чоҥаш проект да смета документацийым ямдылыме нерген увертарыме. Контрактын тӱналтыш акше 27 миллионат 700 тӱжем теҥге. Проект тунемме тӧнежыште эше 500 верым ешараш виктарлтын. Кызытсе зданийже 850 тунемшылан келыштаралтын. Ныл тӱжем квадрат метр кумдыкан у пӧрт тӱҥ зданийым луштараш да тӱналтыш класс- влаклан йӧнан тунемме кумдыкым ышташ полша.
               У блокын икымше пачашыштыже медицина кабинет ден процедурный, логопед ден психологын кабинетышт, тунемме класс- влак, гардероб ден модмо зал лийшаш улыт. Кокымшо пачашым административный пӧлем- влак- директор ден алмаштышыже- влакын кабинетышт, книгагудын увер рӱдерже айлат. Кумшо ден нылымше пачашлаште тунемме кабинет да учительский вераҥыт. У корпус ден ончычсым йӧнан, шокшо куснымо вер ушен шога.
              Тӱҥ зданийыштат вашталтыш лийшаш. Столовыйышто кумдык ешаралтеш. Воктелсе кумдыкышто куржталме корно, волейбол, баскетбол, гимнастике площадке да чарак гоч куржталме корно лийыт. Автостоянкым ыштат. Ушештарена: шушаш ийын рӱдӧ олаште ныл школым олмыкташ 445 миллион теҥгем колташ палемдыме.
            Фото: Денис Речкин.

Прошлые выпуски