Йошкар-Олаште илыше ӱдырамаш 100 ий теммым палемден

Йошкар-Олаште илыше ӱдырамаш 100 ий теммым палемден
              Йошкар-Олаште илыше ӱдырамаш 100 ий теммым палемден. Эртыше рушарнян 8-ше ноябрьыште Клавдия Павловна Егорова ик курымаш лӱмгечыжым пайремлен. Клавдия Егорова 1926-шо ийыште Медведево районысо Изи Чигаш ялыште шуко шочшан ешеш шочын. Тудын йоча жапже сар деч ончычсо ий- влаклан логалын. Ачаже Павел Егорович икымше тӱнямбал сарым эртен, аваже Ксения Николаевна неле паша дене ешыжлан да вич икшывыжлан мо кӱлешым ситараш тыршен.
              Клавдия Чихайдаровышто шым ияш школым тунем пытарен. 1943-шо ийыште 16 ияш ӱдыр печатлыме станок воктеке шогалын. Ончыч типографийын наборный цехыштыже ученице лийын, а шыжылан наборщице квалификацийым налын. Тиде жап гыч тудын типографийыште шуко ияш пашаже тӱҥалын. 1980-шо ийын июнь марте тудо шке илышыжым «Марийская правда» газетым савыкташ ямдылымылан пӧлеклен.
              1953-шо ийыште ешым чумырен, ик ий гыч икымше Маргарита удыржӧ шочын, 1958-ше ийыште кокымшо Люба ӱдыржӧ. Но 42 ияш улмыжо годым тулык пелаш лийын кодын. Туге гынат шкетынак ӱдыр- влакым йол ӱмбаке шогалтен, пашам ыштен, озанлыкым кучен. 1984-ше ийыште пенсийыш лектын, но пашам кудалтен огыл. 1998-ше ий марте Колумб лӱмеш книгагудышто арулыкым эскерен.                   Яра жапыштыже йӧратыме пашажым ыштен: пеш устан тӱрлен, книгам лудын. Тудын пашажым ятыр награде дене палемдыме. Шочмо кечынже именниницылан Российын Президентше Владимир Путин ден Марий Элым вуйлатыше Юрий Зайцев деч лӱман саламлымашым да пӧлекым кучыктеныт.
              Фото: Клавдия Егорован архивше.

Прошлые выпуски