Йошкар-Олаште вуйым пыштыше воин-афганец- влаклан пӧлеклалтше шарнымаш митинг эртен
Йошкар-Олаште вуйым пыштыше воин-афганец- влаклан пӧлеклалтше шарнымаш митинг эртен. 34 ий ончыч совет войскан пытартыш колонныжо Афганистан мландым коден каен. Тыге Совет Армийын салтакше- влаклан 10 ий шуйнышо сар операций мучашлалтын. Совет салтак- влак радамыште Марий АССР- гычат кум тӱжемат 800 рвезе шке салтак порысшым шуктен. Тушечын тӱжемат 600 еҥже- Йошкар-Ола гыч. 73 салтак вуйжым пыштен, 37-ше Йошкар-Ола гыч, кок еҥ увер деч посна йомын. Афганистан мландысе подвигыштлан 400 наре еҥ орден да медаль дене палемдалтын. Теҥгече Рӱдӧ оласе тӱҥ тӱвыра да каныш паркыште шарнымаш мероприятий эртен. Тушто Правительстве вуйлатышын икымше алмаштышыже Евгений Кузьмин, Кугыжаныш Погын вуйлатыше Анатолий Смирнов, Ола округым вуйлатыше Виктор Кузнецов, мэр Евгений Маслов, Афганистан ветеран- влакын Российысе ушемыштын верысе пӧлкажым вуйлатыше Юрий Носырев, Йошкар-Оласе пӧлкажым вуйлатыше Александр Домрачев, ветеран-афганец- влак лийыныт. Нуно да оласе калык вуйым пыштыше- влакым ик тат шып шоген шарналтеныт да стеле деке пеледыш аршашым пыштеныт.
Фото: Йошкар-Ола погынымаш.
Фото: Йошкар-Ола погынымаш.
