Юрий Русановлан 55 ий лиеш ыле…
Юрий Русановын лӱмжӧ Марий тӱняште журналист, поэт, чолга мер пашаеҥ семын кумдан палыме. Тудын почеламут корнылашкыже айдемын кӧргӧ чон шижмашыже келгын возын; журналист семын саманын пӱсӧ йодышыжым лӱдде да тура нӧлталмыж дене пагалымашым сулен налын. Тыгак тудо мер пашашке чолган ушнен, лидер койышыжо шке йырже калыкым чумыраш, тиде але вес йодышым умылаш лийшын рашемдаш полшен. «Илаш – коклаш кече ынже код» — теве тыгай шулдыран ой-савыртышым шке илыш девизшылан налын. Но вийвал пагытыште тудын ӱмыржӧ курылтын. Юрий Русанов лишыл еҥже-влакын чонышто да ушышто веле огыл ила. Тудым тачат пагален шарна марий калык. Тидын нергенак пеҥгыдемден ойла «Юрий Русановлан 55 ий … лиеш ыле» усталык кас. Шарнымаш кас шочмо Морко кундемыштыже 15 майыште лиеш. Эн ончыч 9 шагатлан Немычсола ялыште шӱгар ӱмбакыже пеледыш аршашым пыштат, вара ик шагат гыч Зеленогорск кыдалаш школ пырдыжеш вераҥдыме шарнымашан оҥа дене вуйым сават. Умбакыже Морко посёлкышто 11 шагатлан почеламутым лудшо- влакын конкурсышт, сылнымут да театр мастар-класс- влак эртат. А кастене кугу концерт эрта. Тушто поэтын почеламутшо, тудын мутшылан возымо муро-влак йоҥгаш тӱҥалыт. Касым М.Шкетан лӱмеш Марий драме театрын артистше да эстраде мурызо-влак сӧрастарат.
Фото: Шкетан театр.
Фото: Шкетан театр.
