Марий Элым да Чувашийым вуйлатыше- влак пырля пашам ышташ шонат
Марий Элым да Чувашийым вуйлатыше- влак инвестиций проект- влакым пырля шыҥдараш, ваш-ваш сатум утларак ужалкалаш, вашла кылым кучымо кумдыкым ешараш шонат. Теҥгече Марий Элыш Чуваший гыч делегаций толын каен. Юрий Зайцев ден Олег Николаев вашлиймашым эрареныт. Тушто Петербургысо тӱнямбал экономик форум кышкарыште республике- влак коклаште ыштыме соглашенийым илышыш шыҥдарыме мероприятий планым пеҥгыдемдыме. План почеш увер коммуникаций, транспорт, промышленность, агропромышленный комплекс, торговля, полыш, архитектура, чоҥымаш, илыме вер да коммунал озанлык, тӱзландарымаш, тазалыкаралтыш да туныктымаште кылым кучаш палемда. Кызыт Марий Эл Чувашийыш шыл да шӧр продукцийым, лакокрасочный материалым, чодыра материалым, кагаз ден картоным, мушмо средствым да шуко молымат колта. А Марий Элыш ложаш да тушеч ыштыме сатум, чоҥымо материалым, шӧр ден шӧр продукцийым, плитам, пластмасс пучым, чоҥышо да ял озанлык техникым, оборудованийым кондат. Ик у корнылан инвестиций паша шотлалтеш. Делегаций-влакын вашлиймашышт инвестиций да финанс компетенцийым кугемдаш, бизнесым кумылаҥдыме эн сай паша- влак дене палыме лиймаш, регионласе кугыжаныш виктем опыт дене палыме лиймашке виктаралтын.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
