Юрий Зайцев теҥгече Республикысе клинический эмлыме верын офтальмологий поликлиникышкыже миен
Марий Элым вуйлатыше Юрий Зайцев теҥгече Республикысе клинический эмлыме верын офтальмологий поликлиникышкыже миен. Тудым «Тазалыкаралтышын первичный звеножым модернизироватлымаш» регионысо проект кышкарыште олмыктымо. Уэмдыме поликлиникыште Республикым вуйлатыше регистратурым, диагностик кабинетлам, врач- влакын кабинетыштым, лазерный операционныйым да йоча пӧлкам ончен лектын. Зданийым 1976-шо ийыште чоҥымо, тымарте капитально олмыктымо огыл. Сандене тичмаш куат дене пациент- влакым приниматлен кертын огыл. Икымняр программе кышкарыште зданийым олмыктымо, кызытсе жаплан келшыше оборудованийым налме. Ондак южо диагностик процедурылан еҥ- влакым Москош колтымо, кызыт пациент- влак республикыштак эмлалт кертыт,- палемден Юрий Зайцев. Олмыктымо деч вара йоча- влакым эмлашат йӧн саемын. Офтальмологий поликлинике сменыште 250 еҥым ончен кертеш да уло республике гыч пациент- влаклан кусараш лийдыме план почеш полышым пуа. Олмыкташлан 35 миллион теҥгем кучылтмо, республикын бюджетше гыч мебельым налаш оксам кучылтмо. Олмыктымо деч вара чыла амбулаторно-поликлиник службым иквереш чумырымо. Лишыл жапыште поликлиникын кокымшо пачашыштыже республикысе эндокринологий рӱдер верланышаш. Тудым ышташлан «Сакыр диабет дене кучедалмаш» федерал проект кышкарыште 46 миллион теҥгем ойырымо.
Фото: Марий Элым вуйлатышын администрацийжын увер дене пашам ыштыше пӧлкаже.
Фото: Марий Элым вуйлатышын администрацийжын увер дене пашам ыштыше пӧлкаже.
