Звенигово олаште эҥер серым тӱзландарымаш туризмым вияҥдаш кумылаҥда

             Звенигово олаште эҥер серым тӱзландарымаш туризмым вияҥдаш кумылаҥда. Марий Элым вуйлатыше Юрий Зайцев паша дене Звенигово районыш мийымыже годым олам вияҥдыме план, объектлам тӱзландарыме да коммунал сетьым пужен ыштыме паша дене палыме лийын. Район администарцийым вуйлатыше Владимир Геронтьевын мутшо почеш, икымше йыжыҥым шыҥдарыме кышкарыште Юл сер мучко канен кошташ асфальт корным ыштыме, тул волгыдым пуртымо, ончымо площадкым ыштыме, вӱд деке волымо ныл вер уло, машина шогымо вер, спорт площадке, йоча модмо комплексым ыштыме. Тиддеч посна Кугу сарыште вуйым пыштыше салтак- влакым шарныме стелым уэмдыме, верласе сарлаште вуйым пыштыше да Чернобыль аварийыште лийше- влаклан мемориалым ыштыме. Эҥер серым умбакыже тӱзландарымаш оласе калыклан моткоч кӱлешан.
            Юрий Зайцевлан тыгак Сеҥымашлан 60 ий темме лӱмеш тӱвыра да каныме паркым, корабль- влаклан причал лийшаш верым ончыктеныт. Тыгак эше тушто мом ышташ шонымо нерген каласкаленыт. Тиде пашалан ола 70 миллион теҥгем налеш. Юрий Зайцев палемден: олам вияҥдымаш Юл кундемын транспорт артерийже лияш, турист- влакым кумылаҥдаш полша. Тыгак тудо очистной сооруженийым пужен ыштыме дене палыме лийын. Тиде объектын акше 402 миллион теҥге, оборудованийлан 284 миллион теҥге кая. Объектым 64 процентлан ямдылыме. Районыш мийыме жапыште Марий Элым вуйлатышын пашажым шуктышо районын активше дене вашлийын да йодыш-влаклан вашмутым пуэн.
             Фото: Марий Элым вуйлатышын организаций да аналитик виктемже.

Прошлые выпуски