2019-ше ий Марий Эллан мо дене шарнымашеш кодеш?
У ий шуко еҥлан поро йӱла семын иктешлымаш дене тӱҥалеш. Шукынжо шона: мом кодшо ийын ыштен кертме? 2019-ше ий Марий Эллан калыкле проект- влакым шыҥдараш тӱҥалме, Инвалид- влакын Россий кӱкшытан кеҥежымсе кумшо спартакиадыштым эртарыме, регионым социал-экономически вияҥдыме йодыш дене кӱлешан пашам ыштыме идалык семын лийын. Республикын социал илышыжым ончалаш гын, 19-ше ийыште Оршанке районышто ФАП-ым пашаш колтымо, куснылшо 11 медицина комплексым налме, Волжск олаште йоча поликлиникым олмыктен пытарыме, Республикысе онкологий диспансерыш, клинический эмлыме верыш, Йошкар-Оласе эмлыме верыш у оборудованийым налме. Тиддеч посна «Тазалыкаралтыш» калыкле проект почеш йоча поликлинике да районласе эмлыме вер- влаклан оборудований, мебель, технике налалтеш. Козьмодемьянск олаште поликлиникым умбакыже чоҥат. Тудо шошым почылтшаш. Тений шошымак республикысе перинатал рӱдерым чоҥаш тӱҥалыт. Козьмодемьянскысе эмлыме верлан юж пундашан судным налме, 16 вашкеполыш машина толын. Шоҥгыеҥ-влакым эмлыме верыш шупшыкташ 18 автомобильым налме. Йоча садлаште тӱжемат 200 наре у верым почмо. Йошакар-Оласе Восточный да Интеграл микрорайонлаште, Волжскысо Машиностроитель микрорайонышто да Медведево районысо Знаменский посёлкышто йоча сад- влакым чоҥымо. Тений эше кум тӱжем наре йочалан верым ышташ палемдыме. Параньга районышто у школым почмо, Йошкар-Олаште да Волжскышто у школ чоҥалтеш, школласе 9 спортзалым ачалыме, 41 школ автобус толын. Республикылан 100 ий темме вашеш тӱвыра тӧнеж- влакым олмыктымо, спорт объект- влак чоҥалтыт да почылтыт.
