А.Евстифеев: Ме кӱкшӧ квалификациян специалист- влакым ямдылышаш улына
Правительстве пӧртыштӧ Республикысе кӱшыл шинчымашым стратегически вияҥдыме йодышым каҥашыме. Марий Элым вуйлатыше Александр Евстифеев Юл кундем кугыжаныш технологий университетын коллективше дене вашлийшыла тений вуз- влак ончылно шогышо тӱҥ задаче- влакым палемден. Мемнан вашлиймашна студент- влакым туныктымо йодышлан гына огыл пӧлеклалтын. ВУЗ- влак школ шинчымашым пуымаштат чолган участвоватлат. Ме тыгак калыкле проект- влакым шыҥдарыме нергенат мутланена, республикым вияҥдыме индивидуальный программе нергенат мондышаш огынал. Молан манаш гын, ме кӱкшӧ квалификациян специалист- влакым ямдылышаш улына. Республикысе правительствын пашаштыже ик тӱҥ корно- сай качестван кӱшыл шинчымашым налаш йӧным ыштымаш. Школым тунем пытарыше- влак республикысе вузлашке тунемаш пурен кертышт манын йӧным ыштыман. Сандене пӱтынь туныктымо системым вияҥдыме йодыш пеш кӱлешан. Регионым вуйлатыше тыгак Юлтехын инженерий, Ай-Ти сферылан, ял озанлык да чодыра озанлыклан кадрым ямдылыме пашажым кӱкшын аклен. Туныктыш министр Наталья Адамова Юлтех дене пеҥгыде кыл уло манын каласен. Тудо школ- влак дене кылым куча, профилян дисциплине- влак дене туныкташ полша, кугурак класслаште тунемше- влаклан курсым ямдыла, преподаватель- влак ЕГЭ-м эртарыме годым комиссий радамыш пурат. Министр тыгак моло корно денат кылым пеҥгыдын кучымо нерген ойлен. Ректорын сомылжым шуктышо Игорь Петуховын мутшо почеш, университет тунемше- влакын чотыштым ешарен шога. Тений пытартыш шым ийыште икымше гана бакалавриатыште очно тунемаш бюджет вер- влакым налын. Шкенан республикылан пайдале лияш мемнан йӧннат, кумылнат уло, - каласен Игорь Петухов. Вашлиймаш мучашыште Марий Элым вуйлатыше туныктыш министрлан да ректорын сомылжым шуктышылан калыкле проект- влакым шыҥдарыме шотышто шанче конференцийым эртараш задачым шынден.
