Сенатор Сергей Мартынов Лажъял школлан компьютерым пӧлеклен
Марий Эл деч сенатор Сергей Мартынов Лажъял школлан компьютерым пӧлеклен. Шернур районысо Лажъял кыдалаш школын туныктышо ден тунемшыже- влакым у тунемме ий дене сенатор Сергей Мартынов шке саламлаш миен. Тудлан кӧра тунемме тӧнеж у тунемме идалыкым у компьютер класс дене тӱҥалын. У оборудований сенаторын шке гычын ыштыме пӧлекше. Февральыште тушко толын кайыме деч вара школлан полшаш кумылаҥын. Тыге ик-кок тошто компьютерым вашталташ шонымаш гыч тичмаш кабинетлан у компьютерым пӧлеклен. Туныктымаш качественный лийшаш манын, а тидлан химий, биологий, физике класслаште келшыше оборудований да компьютер класс лийшаш. Шинчымаш кечын Лажъял школысо тунемше- влакым Москосо уна деч посна Шернур районым вуйлатыше Александр Кугергин, Кугыжаныш Погынын депутатше Владимир Кожанов саламленыт. Икымше сентябрьлан тунемме тӧнежым шотыш конденыт: леведышым, спортзалым олмыктымо, пищеблокым тӧрлымӧ, у инвентарьым налме. Тений Шернур районысо школлашке кок тӱжемат 308 тунемше толын. Тушечын 242-шо - икымше классыш.
